I ei sak i danske Politiken, fortel Danmarks statsminister Mette Frederiksen kva USAs president Donald Trump sa til ho etter at landa signerte ein avtale om Grønland denne veka.

– Når vi har skrive under, seier Trump: «Du er ei tøff dame», skriv Frederiksen.

Statsministeren svarte Trump med at det er nokre år sidan han sa det for første gong. Trump responderte med at han hugsa det, ifølge Frederiksen.

– Det kan ein tulle med han om i ein slik situasjon, skriv Frederiksen.

Trump brukte dei same orda om Frederiksen i 2019. Også den gongen var Grønland eit diskusjonstema mellom Danmark og USA.

USA, Grønland og Danmark skreiv tysdag under ein avtale om Grønland.

Avtalen skal styrke Nato-samarbeidet og tryggleiken i Arktis. I tillegg inneber avtalen at USA kan bygge to nye militærbasar på Grønland.

Landa har også tidlegare hatt ein avtale om tryggleiken på Grønland, frå 1951.

Nupi-forskar Per-Erik Solli sa til TV 2 etter signeringa at det viktigaste med avtalen er at den avspenner forholdet internt i Nato.

– Dette er slutten på ein intern verkebyll for Nato, som eigentleg har meir enn nok andre ting å konsentrere seg om. Ei intern spenning mellom Danmark og USA er no avslutta med tre pennestrøk i New York, sa Solli.

Solli sa at utbygginga av nye basar ikkje først og fremst handlar om ein akutt trussel mot Grønland.

– Det er ikkje nokon russisk eller kinesisk militær styrke i nærleiken av Grønland. På den måten er det ein fiktiv trussel, sa han.

Avtalen blei forhandla fram etter ein langvarig strid om øya. I etterkant av signeringa sa utanriksminister Lars Løkke Rasmussen til TV 2 at forholdet til USA har blitt svekka av krisa.