Міжнародная фэдэрацыя веславаньня на каноэ (Paddle Worldwide) з 1 студзеня 2027 году здыме абмежаваньні зь беларускіх і расейскіх спартоўцаў, дазволіўшы ім выступаць пад сьцягам і гімнам дзяржаваў.

Да канца 2026 году дзейныя правілы нэўтральнага статусу захаваюцца.

Пастанову прыняла Рада дырэктараў Міжнароднай фэдэрацыі каноэ.

«Дзейная палітыка будзе заставацца ў поўнай сіле да 31 сьнежня 2026 году. З 1 студзеня 2027 году яна перастане дзейнічаць, і весьляры зь дзьвюх краінаў, якія маюць права на ўдзел, а таксама пэрсанал змогуць выступаць у складзе нацыянальных камандаў», — гаворыцца ў заяве Paddle Worldwide.

Для спаборніцтваў, заплянаваных да 1 студзеня 2027 году, будзе дзейнічаць паэтапны падыход. Пакуль прадугледжаны паўнавартасны нацыянальны ўдзел, аднак калі мясцовае заканадаўства або абавязковыя дзяржаўныя абмежаваньні перашкаджаюць гэтаму, спартоўцы змогуць выступаць з нацыянальнай формай, але бязь сьцягу і гімну. Часта толькі ў нэўтральным статусе.

Міжнародныя спартовыя фэдэрацыі і Міжнародны алімпійскі камітэт (МАК) увялі абмежаваньні для расейскіх і беларускіх спартоўцаў пасьля маштабнага расейскага ўварваньня ва Ўкраіну ў лютым 2022 году, якому спрыяў рэжым Лукашэнкі.

7 траўня 2026 году выканаўчы камітэт МАК скасаваў ранейшыя рэкамэндаваныя ўмовы ад 28 лютага 2022 году і 28 сакавіка 2023 году ў дачыненьні да Беларусі і беларускіх спартоўцаў, у тым ліку ахоўныя меры.

Поўнае адхіленьне беларускіх спартоўцаў ад спаборніцтваў пад сваёй эгідай захавала Міжнародная фэдэрацыя лёгкай атлетыкі. У тэнісе беларусы могуць выступаць толькі індывідуальна. У хакеі беларускім камандам дазволілі вярнуцца ў тры турніры сэзону 2026–2027 гадоў.

У заяве Выканаўчага камітэту МАК ад 7 траўня адзначалася, што з сакавіка 2023 году спартоўцы зь беларускімі пашпартамі ўдзельнічалі ў якасьці індывідуальных нэўтральных спартоўцаў у многіх міжнародных спартовых імпрэзах, у тым ліку ў Алімпійскіх гульнях 2024 году ў Парыжы і зімовых Алімпійскіх гульнях 2026 году ў Міляне, безь якіх-небудзь інцыдэнтаў на полі або па-за ім.

У МАК зьвярнулі ўвагу на тое, што сытуацыя з Расейскім алімпійскім камітэтам адрозьніваецца ад сытуацыі з Нацыянальным алімпійскім камітэтам Беларусі.

«НАК Беларусі мае добрую рэпутацыю і выконвае Алімпійскую хартыю», — гаворыцца ў тлумачэньні.

Дазвол удзельнічаць у спаборніцтвах маюць даваць канкрэтныя арганізатары і міжнародныя фэдэрацыі, яны маюць зважаць на рэкамэндацыі МАК, але не абавязаныя зь імі пагаджацца.