Пра гэта паведаміў сайт праваабарончай арганізацыі Forum 18 з Нарвэгіі, якая займаецца маніторынгам парушэньняў рэлігійных правоў і свабод.

У 2026 годзе беларускія ўлады адхілілі просьбу гэтага чалавека аб прытулку і адхілілі яго апэляцыі на адмову. Прозьвішча вывезенага ў Расею верніка не называецца.

Вядома, што раней Беларусь надала прытулак некалькім «сьведкам Яговы» з Расеі і адхіліла запыты аб экстрадыцыі. Цяпер сытуацыя мяняецца.

Расея забараніла ўсе суполкі і дзейнасьць «сьведкаў Яговы» ў 2017 годзе і прыцягнула да адказнасьці многіх асоб, якія належаць да «сьведкаў Яговы».

«Сьведкі Яговы» выказалі занепакоенасьць Форуму 18 з нагоды гэтай відавочнай зьмены падыходу беларускіх уладаў да іх вернікаў з Расеі, — паведамілі праваабаронцы.

У Беларусі «сьведкі Яговы» не зьяўляюцца забароненай ці экстрэмісцкай арганізацыяй. Беларускія праваахоўныя органы некалькі разоў адмаўлялі Расеі ў выдачы ёй расейскіх грамадзянаў, якіх у Расеі абвінавачваюць у датычнасьці да «сьведак Яговы».

У Расеі і на акупаваных ёю тэрыторыях вернікі рэлігійнай арганізацыі «сьведак Яговы» атрымліваюць рэальныя турэмныя тэрміны. Так, у 2022 годзе трое «сьведкі Яговы» ў анэксаваным Севастопалі атрымалі па 6 гадоў пазбаўленьня волі, паведамляла Ўкраінская служба Радыё Свабода.

Як паведамляе сайт расейскіх «сьведкаў Яговы», цяпер у расейскіх у калёніях знаходзяцца 229 вернікаў, умоўна асуджана 355, штрафамі пакаралі 118 вернікаў. Пад арыштам агулам былі 547 вернікаў, сілавікі правялі ў іх 2389 ператрусаў.

У красавіку 2017 году Вярхоўны суд Расеі прызнаў «сьведак Яговы» экстрэмісцкай арганізацыяй і забараніў іх дзейнасьць на тэрыторыі РФ.

У лютым 2020 году Расфінманіторынг уключыў больш за 200 пасьлядоўнікаў гэтай рэлігійнай плыні ў сьпіс арганізацыяў і фізычных асобаў, якія маюць дачыненьне да экстрэмісцкай дзейнасьці або тэрарызму. З таго часу сьпіс неаднаразова папаўняўся, а дзясяткі «сьведак Яговы» атрымалі рэальныя турэмныя тэрміны.

Праваабарончы цэнтар «Мэмарыял» лічыць палітвязьнямі зьняволеных у Расеі «сьведак Яговы». Многія з затрыманых заяўлялі аб катаваньнях.