Часам арганізм выдае нечаканыя рэакцыі. Новае даследаванне сэксолагаў упершыню сабрала лічбы пра нарматыўныя і незвычайныя паводзіны цела і назвала нагоды для хвалявання. 

Фота: Getty Images

Аргазм прынята лічыць кульмінацыяй сэксуальнага задавальнення — яркай, інтэнсіўнай, але прадказальнай рэакцыяй цела. Аднак для некаторых людзей гэты момант суправаджаецца нечаканымі эмацыйнымі і фізічнымі праявамі: раптоўным смехам, слязьмі, смуткам, галаўным болем ці нават галюцынацыямі.

Новае даследаванне Паўночна-Заходняга ўніверсітэта (ЗША) упершыню прадставіла сістэматычныя звесткі пра тое, як часта ўзнікаюць такія з'явы, пры якіх абставінах і ці варта іх асцерагацца.

У даследаванні, апублікаваным у Journal of Women’s Health, узялі ўдзел каля 3800 чалавек. Перад апытаннем яны паглядзелі тлумачальнае відэа пра так званыя перыаргазмічныя феномены — незвычайныя рэакцыі, якія ўзнікаюць падчас аргазму ці адразу пасля яго. Затым удзельнікі ананімна адказалі на пытанні пра ўласны досвед.

86 чалавек — гэта значыць 2,3% выбаркі — паведамілі, што сутыкаліся з падобнымі з'явамі. Хоць паказчык здаецца невялікім, у статыстыцы ўзровень ад двух працэнтаў ужо лічыцца вымернай частатой, а не выпадковым выключэннем. Гэта азначае, што гаворка ідзе не пра экзатычныя адзінкавыя выпадкі, а пра рэальны, хай сабе і рэдкі феномен.

Найбольш распаўсюджанымі былі эмацыйныя рэакцыі. 88% з тых, хто перажываў незвычайныя з'явы, паведамлялі пра смех, плач або раптоўны смутак. Прычым каля 63% плакалі падчас або адразу пасля аргазму, а 43% — смяяліся ці адчувалі смутак.

Фізічныя сімптомы адзначаў 61% удзельнікаў з такім вопытам. Сярод іх: галаўны боль (33%); цягліцавая слабасць (24%); боль альбо паколванне ў ступнях (19%); боль, сверб або паколванне ў твар (6%); чханне (4%); галюцынацыі (4%); крывацёк з носа (2%); боль або іншыя незвычайныя адчуванні ў вушах (2 %).

Больш за палову (52%) паведамілі, што адчувалі адразу некалькі сімптомаў, а кожны пяты (21 %) — і эмацыйныя, і фізічныя праявы адначасова.

Цікава, што незвычайныя рэакцыі значна часцей узнікалі падчас сэксу з партнёрам, чым пры мастурбацыі. 51% адзначыў, што феномены праяўляліся выключна пры сэксуальнай актыўнасці з партнёрам. Дзевяць працэнтаў сутыкаліся з імі падчас мастурбацыі, а 14% — пры выкарыстанні вібратара.

Большасць жанчын (69%) адчувалі падобныя сімптомы толькі зрэдку, тады як 17% — рэгулярна.

Даследчыкі мяркуюць, што важную ролю можа адыгрываць сацыяльна-эмацыйны кантэкст. Падчас блізкасці з партнёрам актывуюцца не толькі фізіялагічныя механізмы ўзбуджэння, але і складаныя эмацыйныя працэсы, якія могуць узмацняць незвычайныя рэакцыі.

Галоўная аўтарка даследавання, доктар Лорэн Штрэйхер, падкрэслівае, што вынікі нельга аўтаматычна распаўсюджваць на ўсё насельніцтва. Удзельнікі былі прыцягнутыя праз сацыяльныя сеткі, дзе Штрэйхер апублікавала відэа пра праект. Паколькі яна пераважна працуе з жанчынамі ў перы– і постменапаўзе, мяркуецца, што большасць удзельнікаў былі жанчынамі. Менавіта таму ў назве даследавання гаворка ідзе пра «сімптомы ў жанчын».

Аднак пол удзельнікаў сістэматычна не фіксаваўся, таму ў выбарцы маглі прысутнічаць і мужчыны. Штрэйхер прызнае гэта абмежаваннем даследавання, але адзначае, што ў медыцынскай літаратуры ёсць апісанні аналагічных выпадкаў і ў мужчын.

Аўтары падкрэсліваюць: перыаргазмічныя феномены не адносяцца да класічнай фізіялогіі аргазму, аднак не лічацца паталогіяй. Яны ўзнікаюць непасрэдна падчас кульмінацыі ці адразу пасля яе і цесна звязаныя ў часе з пікам узбуджэння.

Прычыны такіх рэакцый пакуль застаюцца нявысветленымі. Навукоўцы мяркуюць, што магчымую ролю адыгрывае адначасовая актывацыя сімпатычнай і парасімпатычнай нервовай сістэмы падчас аргазму. У людзей з павышанай успрымальнасцю гэтае «накладанне» можа выклікаць нечаканыя эмацыйныя ці цялесныя праявы.

Даследчыкі падкрэсліваюць, што галоўная мэта працы — зняць трывогу ў тых, хто сутыкаецца з падобным досведам. Паводле іх слоў, раптоўны смех ці слёзы ў момант кульмінацыі не азначаюць, што з чалавекам «нешта не так». Гэта можа быць часткай нармальнага спектру сэксуальных рэакцый.

Паводле аўтараў, гэта першае сістэматычнае даследаванне такіх феноменаў. Раней звесткі пра іх грунтаваліся толькі на апісаннях асобных клінічных выпадкаў.

Даследчыкі падкрэсліваюць, што атрыманыя вынікі — толькі пачатак далейшага вывучэння тэмы. Аднак ужо цяпер яны пашыраюць разуменне разнастайнасці сэксуальнага досведу і сведчаць пра тое, што нават нечаканыя рэакцыі падчас аргазму могуць заставацца ў межах нормы.

Усе навіны →