Նախապատմական մեգալոդոնի՝ Երկրի վրա երբևէ ապրած ամենամեծ շնաձկան, որի հանրաճանաչությունը խթանել են հոլիվուդյան սարսափ ֆիլմերը, հսկայական ատամը հայտնաբերվել է Ջերսի Շորի ափին Փենսիլվանիայից հանգստի եկած հայր ու որդու կողմից։

42-ամյա Մայքլ Բաուերսը (Michael Bowers) պատմել է, որ 3,6 միլիոն տարվա հնություն ունեցող հին գիշատչի բրածոն գտել է Սի-Այլ-Սիթի կատարած այցի ընթացքում՝ իր 11-ամյա որդի Բոյի հետ միասին։

Նրանք քայլում էին ալեկոտորի մոտով, երբ նկատեցին ատամը նեղ ճեղքում։

Բաուերսը չկարողացավ ձեռքը մտցնել ճեղքի մեջ, որպեսզի հանի հին ատամը, սակայն նրա որդի Բոն հեշտությամբ կատարեց այդ խնդիրը և դուրս բերեց գտածոն։ «Նման բան գտնելը իմ նվիրական ցանկությունների ցանկում էր», — խոստովանել է Բաուերսը։ «Ծնկներս դողում էին»։

Նրանք իրենց գտածոն ցույց են տվել Քեյփ Մեյի Կետերի և դելֆինների դիտարկման ու հետազոտական կենտրոնում (Cape May Whale Watch and Research Center), որտեղ մասնագետները հաստատել են, որ դա իսկական բրածո է։

Հետազոտական կենտրոնի գիտական տնօրեն Մելիսա Լաուրինոյի (Melissa Laurino) խոսքով՝ ատամը պատկանել է մեգալոդոնին՝ ահեղ շնաձկների մի տեսակի, որոնք հասնում էին մինչև 60 ֆուտ (մոտ 18 մետր) երկարության և վերացել են ավելի քան 3,6 միլիոն տարի առաջ։

Փորձագետների խոսքով՝ Նյու Ջերսիում այս նախապատմական ծովային գիշատչի բրածոները հանդիպում են չափազանց հազվադեպ։

Ինչպես հայտնել է Նյու Ջերսիի պետական թանգարանի համադրող Դանա Էհերտը (Dana Ehert), նահանգի տարածքում հայտնաբերվել է մեգալոդոնի հինգից պակաս ատամ։

Հետազոտողները կարծում են, որ ատամը ծովի հատակից վեր է բարձրացվել ավազի պաշարների վերականգնման աշխատանքների ընթացքում, որոնք ԱՄՆ բանակի ինժեներական կորպուսը հուլիսին իրականացրել էր Սի-Այլ-Սիթիում։