Den slåande utsikta frå nedstiginga av Utvikfjellet får både turistar og lokalbefolkning til å stoppe opp.

August er ein av årets mest trafikkerte månader for fjellovergangen mellom Byrkjelo og Utvik.

Dei neste fire månadane skulle vegen over fjellet vere stengt i opptil fem timar midt på dagen.

No stoppar Vestland fylkeskommune arbeidet på ubestemt tid.

Fylkesvegen treng omfattande vedlikehaldsarbeid, og det skulle etter planen vare fram til november.

Mange av bedriftene i området er små og sesongbaserte, og vegen er mykje brukt av både turistar og næringsliv.

I 2025 køyrte rundt 2500 bilar over vegen på sommaren, mot 816 på vinteren same år.

Tidspunkta og lengda på stenginga fekk næringslivet til å reagere.

– Ei slik stenging ville fått dramatiske konsekvensar for reiselivet midt i turistsesongen, seier Bjørn Lødemel, leiar i Sogn og Fjordane næringsråd.

Fleire av reiselivsaktørane på begge sider av fjellet fortel at dei fekk vite om stenginga først førre veke. Dei blei heller ikkje involvert i planlegginga.

– Det er spesielt når dei ikkje får eit varsel på meir enn fem dagar på ein så omfattande stenging. Det er midt i turistsesongen i indre Nordfjord, sjølv om fellesferien er over, seier Lødemel.

Også dagleg leiar i Visit Nordfjord er kritisk til korleis saka er handtert av fylket, og fryktar det vil påverke turismen.

– Ein set trafikken inn på andre omkøyringar, og det kan føre til kanselleringar og ombookingar, seier Lars Gimmestad som er dagleg leiar i Visit Nordfjord.

Heller ikkje Stryn eller Gloppen kommune blei involvert i planlegginga, noko begge ordførarane reagerer kraftig på.

Gloppen kommune fekk aldri beskjed om arbeidet, før informasjonen blei offentleggjort.

– Det er kritikkverdig og tar veldig lite omsyn til innbyggjarane, reiselivet og kommersielle behov når det gjeld tidspunktet for vedlikehaldet, seier fungerande ordførar, Jan Ove Rygg.

Fylkeskommunen kontakta Stryn kommune i slutten av juni. Då blei det sendt eit brev til leiinga innan helse og sosial og beredskap. Brevet blir ikkje sendt vidare i kommunen.

Per Kjøllesdal er ordførar i Stryn kommune og fortel at han ikkje fekk vite om planane før 5. august.

Han fortel at brevet ikkje blei sendt vidare i kommunen fordi det ikkje blei noko vidare dialog mellom helseavdelinga og fylket.

I brevet er det ikkje nemnt tidspunkt for stenging, eller dato for arbeidet.

Vestland fylkeskommunen legg seg flate, og innrømmer at saka kunne vore handtert betre.

– Vi burde vore grundigare i dialogen på førehand, sånn at dette blei meir føreseieleg før vi starta opp, seier direktør for infrastruktur og veg, Dina Lefdal.

Ho fortel at belastinga på vegen er stor, og arbeidet er naudsynt. Dei ønsker å bli ferdige til vinteren, men jobbar no med ei løysing som ikkje får like store konsekvensar for næringslivet.

– Det er ferietid og ein har vel hatt ønske om å kome i gang så fort etter ferien. Og då har det vel blitt som det har blitt. Så vi må berre beklage det, seier Lefdal.

Fylkeskommunen er no i dialog med entreprenøren for å sjå om det er mogleg å flytte stenginga til eit tidspunkt på døgnet trafikken ikkje er like stor.

Så langt har ordføraren i Stryn ikkje høyrt noko frå fylkeskommunen. Han håpar arbeidet kan skje på nattetid, når trafikken ikkje er like stor.

Når arbeidet faktisk startar er uvisst. Prosjektet er rekna å koste om lag 11 millionar kroner. Fylkeskommunen vil ikkje kommentere kva økonomiske kostnadar utsetjinga av arbeidet vil få.