У новым пераліку засталіся 364,2 тысячы жыхароў (скарачэньне ў 2,6 разу) і 1845 населеных пунктаў, падлічыў «Позірк».

«Аналіз вынікаў праведзенай у 2021–2025 гадах Міністэрствам прыроды і Міністэрствам здароўя працы ў абсьледаваньні забруджаных тэрыторыяў з адборам пробаў глебы і ацэнкай дозавых нагрузак на насельніцтва паказаў значнае паляпшэньне сытуацыі ў асобных населеных пунктах, разьмешчаных на забруджаных радыянуклідамі тэрыторыях», — гаворыцца ў паведамленьні.

Пастанова набудзе моц 1 студзеня. Бясплатнае харчаваньне для дзяцей, якія жывуць або вучацца на тэрыторыях, што раней лічыліся забруджанымі, застанецца да наступнага лета.

Сёлета ў красавіку намесьнік начальніка дэпартамэнту ядзернай і радыяцыйнай бясьпекі МНС Леанід Дзедуль заявіў, што ў 1986 годзе ў Беларусі было забруджана радыянуклідамі больш за 3500 населеных пунктаў з насельніцтвам 2,2 млн чалавек, а на 1 студзеня 2026 году — 2013 і 922 тысяч адпаведна.

Годам раней Аляксандар Лукашэнка на профільнай нарадзе задаўся пытаньнем: «Чым жа мы тады займаліся 30 гадоў, калі ў нас 900 тысяч жывуць на забруджаных тэрыторыях?»

«Чаго вы дагэтуль называеце лічбы, якія былі 40 гадоў таму? Трэба прыводзіць (як бы гэта ні было папулярна ці непапулярна) у адпаведнасьць [з рэчаіснасьцю]», — заявіў тады ён.

Аляксандар Лукашэнка пасьлядоўна заяўляе, што небясьпека наступстваў Чарнобыльскай катастрофы перабольшаная, а на забруджаныя тэрыторыі трэба вяртаць людзей і аднаўляць там сельскагаспадарчую дзейнасьць.

У 2016-м пасьля чарговай заявы Лукашэнкі старшыня грамадзкага аб’яднаньня «Экадом» Ірына Сухій адзначыла, што выдаткі на лекаваньне людзей могуць быць большымі за магчымую эканамічную выгаду.

«На жаль, цяпер мы назіраем тэндэнцыю на прыніжэньне наступстваў катастрофы на ЧАЭС: маўляў, гэта было даўно і ўжо ўсё мінула. Гэта няпраўда. Чарнобыль з намі яшчэ на многія-многія гады. А нейкія эканамічныя выгоды, якія Беларусь атрымлівае з выкарыстаньня забруджаных зямель, будуць зьнішчаныя выдаткамі на мэдыцыну», — сказала тады яна.