26/06/2026 a las 10:55h.

La banda Gaiteros del Carbón, que dirixe Pablo Carrera, sigue celebrando el so décimu aniversariu con unaSelmana Cultural que va desenvolvese na Pola Llaviana dende'l miércoles 1 de xunetu con actividaes divulgatives y formatives, amás de l'apertura d'una esposición sobre la historia de la formación musical nel CIDAN y una folixa el domingu 5 nel prau de La Chalana.

Asina, el miércoles 1 van impartise entrambos cursos d'instrumentos de cocina (17) y de pandereta (19.30), a cargu de Vanesa Muela. El xueves 2, va ser Pablo Seoane l'encargáu d'empobinar un cursu de baille tradicional gallegu (17) y una charra sobre la gaita de la comunidá vecina (19.30). El postreru de los cursos ta dedicáu a la txalaparta, el singular instrumentu tradicional de percusión propiu del País Vascu y que va impartir Iñaki Plaza. Les inscripciones nos distintos cursos han facese na páxina web de Gaiteros del Carbón.

Al empar, tamién nel espaciu del Centru d'Innovacion y Desarrollu Altu Nalón va poder vese l'amuesa comemorativa de los diez años de la banda de gaites.

El domingu 5 el prau de La Chalana acueye el festivalín La Pitanzacon food trucks, una sesión de vermú en danza con Pau Santriso y María Vázquez (13) y pa rematar un conciertu del grupu Abéu (19).

Gaiteros del Carbón ye una banda que resalta pola mocedá de los sos integrantes, toos d'estremaos llugares de la cuenca'l Nalón y el so compromisu cola cultura minera. El pasáu xineru festexaben el so décimu aniversariu con un esitosu conciertu nel Teatru José León Delestal de La Felguera, nel que contaron cola participación de nomes como Víctor Manuel, Celtas Cortos, Marisa Valle Roso, Nuberu, Hevia, José Manuel Tejedor o Xune Elipe. Agora siguen festexando estos 10 años en camín.